Resumen de A comunicación en Galicia 2013
Xosé López García (coord.), Manuel Rivas (coord.), Rosa Aneiros Díaz (coord.)
Este traballo inclúe dezasete contribucións en que se achegan outras tantas reflexións ao redor dalgúns dos aspectos da comunicación e da cultura en Galicia nestes tempos do terceiro milenio. Son todos os que están, aínda que faltan outros enfoques posibles e outros ámbitos ao redor dos que tamén haberá que reflexionar, en especial sobre a formación dos comunicadores e a investigación da comunicación no noso país. O vindeiro informe da comunicación dará conta das próximas transformacións do sector e porá de manifesto se, efectivamente, tal e como determinan os agoiros, a crise de modelo de negocio permanecerá durante un tempo máis ou comezan a establecerse iniciativas viables no ámbito da comunicación en Galicia. O que resulta evidente é que non hai volta atrás e que temos diante de nós un futuro incerto e, tamén, cheo de oportunidades, se a brétema dos avances tecnolóxicos e da crise económica non nos fai esquecer a importancia dos contidos e da sociedade que, de xeito cada vez máis activo e crítico, os recibe e emite.
