Xoaquín Lorenzo Fernández (Ourense, 1907Lobeira, 1989),etnógrafo, arqueólogo, historiador, profesor, fotógrafo, debuxante, fundador do Museo do Pobo Galego, membro da Real Academia Galega, foi homenaxeado co Día das Letras Galegas 2004.
O presente volume, Xoaquín Lorenzo (1907-1989). Unha fotobiografía, preparado por Afonso Vázquez-Monxardín Fernández, constitúe a achega máis acaída sobre o percorrido biográfico e autoral de Xoaquín Lorenzo. Precedida por unha presentación do Museo do Pobo Galego e dunha cronoloxía do autor, recolle centos de fotografías (a maior parte inéditas), textos e documentos organizados nas seguintes etapas:
1907-1923: A infancia e a mocidade. A descuberta de Galicia.
1923-1936: Os tempos do Seminario de Estudos Galegos. O compromiso coa Terra.
1936-1941: A fenda da guerra. Sobrepóndose á desfeita.
1941-1963: O traballo posible. Arqueoloxía e etnografía.
1963-1977: A ilusión dos novos tempos. A confianza na mocidade.
1977-1989: O fío da memoria. Tempo de homenaxes e recoñecementos.
A obra, ademais do percorrido fotobiográfico, inclúe ensaios de Clodio González Pérez (Xocas: Biografía), de Francisco Fariña e Xulio Rodríguez (Dimensión arqueolóxica de X. Lorenzo), de Xosé Manuel González Reboredo (Don Xoaquín Lorenzo Fernández e os estudos da sociedade, a literatura oral e as crenzas da Galicia campesiña), de Francisco Calo Lourido (Xaquín Lorenzo Fernández e o mundo do mar), de Francisco Fernández Rei (A terminoloxía tradicional e a construción do galego estándar), de Xosé C. Sierra Rodríguez (Palabras e cousas. Achegamentos visuais ó coñecemento etnográfico), de Segundo Alvarado (Don Xoaquín Lorenzo, un solteirón, pais de moitos) e Xosé Lino Vázquez-Monxardín Blanco (A lembranza dun bo e xeneroso). O volume complétase cunha bibliografía de e sobre Xoaquín Lorenzo. A edición desta fotobiografía realizouse en colaboración entre o Museo do Pobo Galego, o Consello da Cultura Galega e Edicións Xerais de Galicia.
© 2001-2024 Fundación Dialnet · Todos los derechos reservados