Continuando co proxecto dos seus Albums de postais, que recollen a imaxe proxectada nas tarxetas postais, durante as primeiras décadas do século XX, dalgunhas das vilas galegas emblemáticas, Xerais publica A memoria de Vilalba. José-Luís Novo Cazón, presidente do Instituto de Estudos Chairegos, preparou o ensaio introdutorio, titulado Vilalba na memoria, na que realiza un amplo percorrido pola historia (dende a orixe remota ata a Vilaalta medieval, dende o desenvolvemento urbano da vila murada á cidade aberta na Idade Contemporánea), e pola memoria recente da súa vila natal. O auxe e decadencia das feiras, as institucións benéficas e educattivas, a república literaria e xornalística, as iniciativas artísticas e musicais, o asociacionismo e apolítica, ou as diversións vilalbesas son outros temas que aborda o fermoso texto literario.
© 2001-2024 Fundación Dialnet · Todos los derechos reservados