Resumen de Handira jokatzeko garaia da: "Euskararen Herria Euskal Hiztun" jardunaldiak
Euskararen ezagutzak, erabilerak eta normalizazioak hizketagai eta hausnarketagai izaten jarraitzen dute. Azkenaldian gehiago agian, horren inguruko jardunaldiak egin direlako, galdeketa berrien emaitzak ezagutzera eman direlako, Euskaraldiaren ariketa kolektiboa egin delako, pandemiaren ondoren hainbat gabezia eta ahulgune agerian geratu direlako eta abar. Euskalgintzaren Kontseiluak eta Eusko Jaurlaritzak azaroan antolatutako "Euskararen Herria Euskal Hiztun" jardunaldietan euskararen ezagutza unibertsalizatzeko beharra azpimarratu zuten parte-hartzaileek, eta baita ezinbestean horrekin lotuta dagoen erabilera ziurtatzeko premia ere. Egungo testuinguruan kokatuta, berau aztertu eta hortik abiatuta, ideia, proposamen eta erronka gaurkotuak planteatu zituzten, hala hezkuntza esparruko nola gizarte osorako.
