Resumen de Familia ereduak eta eskola
Aski du nork bere ikasgelari erreparatzea, jabetzeko gaur zenbat familia eredu desberdin dauden. Ikasgela askotan, familia eredu tradizionala jada gehiengo izatetik salbuespen izatera ere pasa da. Bananduak, guraso bakarrak, adoptatutako haurrak, harrera etxeetan bizi direnak, familia homosexualak... eta beste hainbat eredu badira gure gizartean. Etorkinekin, gainera, beste gizartetan "tradizionalak" diren ereduak datozkigu, gurean "berri" izatera.
Gizartean jada errealitate nabarmena dena, eskolan ez da oraindik islatzen, ordea. Eredu tradizionala da oraindik irudikatzen den bakarra testu liburu, ipuin zein ikasgaietan. Horixe da guraso kolektibo askoren kezka, eta jada beste kolektiboekin elkartuta hasiak dira eskolako gabezia horiek aztertzen. Euren irakurketa jaso asmoz familia gurasobakarrekin, haur adoptatuen gurasoekin eta homosexualen kolektiboarekin bildu gara.
