Resumen de Izenaduba basoa: izena duen guztia... bada!
Mari, Basajauna, Tartalo, Akerbeltz, galtzagorriak, Mari Teiletako… eta, jakina, Olentzero. Pertsonaia mitologiko horiek guztiak eta gehiago aurki daitezke Izenaduba basoan. Basoaren goiko aldean dago Landetxo Goikoa baserria, eta hantxe bizi da Olentzero. Olentzeroren etxea baserri magikoa da, gainera, eta, erdi-erdian, zuhaitz magikoa du. Zuhaitzaren azpiko aldean, berriz, Mariren koba dago. Euskal Herriko lehen parke mitologikoa da Izenaduba, eta iazko abenduan zabaldu zuten, Mungian. Gure mitologia horren aberatsa izanda ere, mitologia hori erakusteko tokirik ez zegoela ikusita zabaldu zuten Izenaduba, eta milaka eta milaka pertsonak bisitatu dute inguru magiko hori urtebetean.
