Resumen de As aves necrófagas en Galicia: perspectiva histórica e actual, prioridades de conservación
Alberto Gil Carrera, Xabier Vázquez Pumariño, Luis Tapia
Actualmente, en Galicia pódense observar tres especies de aves necrófagas, todas elas pertencentes á Familia Accipitridae (Orde Falconiformes). Dúas delas, o voitre leonado (Gyps fulvus) e o voitre negro (Aegypius monachus), non son reprodutoras a día de hoxe, e compórtanse como especies dispersivas ou migrantes en territorio galego. O voitre branco (Neophron percnopterus), pola contra, si é reprodutora estival, se ben é moi escasa e as súas áreas de nidificación están moi localizadas en Galicia. O incremento da presenza dos voitres negro e leonado no noso territorio e a delicada situación de conservación a nivel mundial do voitre branco fan necesaria unha revisión do seu estatus de conservación legal en Galicia, así como a aplicación de medidas activas de conservación e avaliación da evolución destas tres especies.
