Resumen de Hizkuntza aniztasuna eta elkarbizitza
Munduko hizkuntza-dibertsitatea, planetaren dibertsitate naturalarekin parekatu daitekeen altxorra da. Baina UNESCOren Endangered Languages izeneko txostenaren arabera, hizkuntza ugari dira galtzeko arriskuan edo mehatxupean. Zerrenda gorri horretan agertzen da euskara. Egoera hori azaltzen duten hainbat gai lantzen dira artikuluan, esate baterako, eguneroko gizarte bizitzan, euskarak, Espainiako hizkuntza nazionalaren nagusitasuna aurrez aurre izatea eta nazioarteko beste hizkuntza indartsuekin batera bizi beharra, teknologia berrien aro globalizatuan.
Zailtasunen aurrean euskarak bizirauteko erronka gizarte eleanitza eraikitzean dagoela dio egileak, elkarbizitzarako oinarri modura. Abiapuntutzat, gaur egungo elkarbizitza zailtzen dituzten hainbat aldagai aztertzen ditu, hain zuzen, gure arteko prentsa idatzian ageri diren euskarari buruzko hizpideak, prentsa eta gaztetxoen iritzien alderaketa, euskararen eztabaida publikoan ageri diren subjektuak, helburuak eta bitartekoak, politizazioa edota askatasunaren auzia.
