Lletres Asturianes

Lletres Asturianes ye’l Boletín de l’Academia de la Llingua Asturiana. La revista, qu’espubliza dos númberos añales, entamó a imprentase nel añu 1982. Dientro de cada númberu apaecen les estayes que vienen darréu:


1. Entamu o editorial (seición non fixa), onde s’inxer l’asitiamientu de l’Academia en rellación con aspeutos que se xulguen d’especial interés pal futuru de la llingua asturiana.

2. Trabayos orixinales d’investigación.

3. Seición "D’otramiente" (seición non fixa), qu’acueye pequeños trabayos y notes (en cualquier casu ensin asoleyar y siempre rellacionaos cola temática de la revista).

4. Reseñes bibliográfiques.

5. Notes y anuncies, que recueyen informaciones destacaes que cinquen a l’actualidá de la llingua y al facer de la Institución, asina como un apartáu específicu de “Llibrería Asturiana”.

6. Normes pa la presentación de trabayos.

7. Guía de bones práutiques.


Lletres Asturianes asoleya trabayos científicos orixinales que tengan como oxetu del so estudiu la llingua y la lliteratura asturianes, entendíes nun sen ampliu y na so rellación col ámbitu hispánicu y románicu. Del mesmu mou, amiesta tamién otros trabayos de calter antropolóxicu, pedagóxicu y sociollinguísticu, enfotaos toos ellos na meyora de la conocencia, la problemática y la normalización de la llingua asturiana. Los conteníos de los artículos son responsabilidá dafechu de los sos autores. L’Academia nun ta obligada a volver los orixinales que nun s’asoleyen.


Lletres Asturianes espublízase semestralmente (marzu y ochobre); y, arriendes d’en formatu convencional, en versión dixital d’accesu llibre dende’l númberu 105 (2011).

Les aportaciones científiques qu’acueya la revista han ser xulgaes, necesariamente, por evaluadores ayenos al Conseyu de Redaición acordies col procesu denomáu «doble ciegu».












Lletres Asturianes
Academia de la Llingua Asturiana
C/ L’Águila 10
33003 Uviéu
T. +34 985 211 837
alladixital.org
ISSN (versión dixital): 2174-9612
ISSN (versión impresa): 0212-0534
Depósitu Llegal: U-826/82
© Academia de la Llingua Asturiana